Mafube behaal 6% op die Ouditeur-Generaal se Telkaart

Die Mafube Besigheidsforum (MBF) het voorheen berig oor die gebruik van konsultante vir die taak om die finansiële state van die Mafube Plaaslike Munisipaliteit (MPM) vir 2024/5 by die kantoor van die Ouditeur-Generaal (OG) in te dien voor die wetgewende datum. MBF het die hoë koste (meer as R5 miljoen) bevraagteken om eksterne kontrakteurs aan te stel om 'n funksie te verrig wat binne die vermoë van die senior bestuurspan behoort te wees, wie reeds groot salarisse ontvang. Tydens 'n vergadering met die Munisipale Bestuurder (of MM), Me. Jemima Selepyane, is die saak van 'n verpligte vaardigheidsoordrag- ooreenkoms met die konsultante bespreek, maar tot op hede is ons versoeke om inligting deur beide die MM en die aangestelde konsultante geïgnoreer.

Mafube – ‘n “Lopende Bedryf”?

Dit behoort geen verrassing te wees dat MPM se oudituitkoms vir die finansiële jaar wat op 30 Junie 2025 eindig, weereens as "Gekwalifiseerd" beskou word  - wat weereens 'n “druip” vir Mafube beteken! Dit is as gevolg van wesenlike onreëlmatighede wat in die finansiële sake van die munisipaliteit opgespoor is, en die twyfel wat deur die OG uitgespreek is oor MPM se voortsetting as 'n "lopende bedryf". Die OG het bevind dat die munisipaliteit 'n opgehoopte tekort van R104 525 580 gehad het en dat sy laste sy totale bates met R1 141 934 921 oorskry.

MPM misluk nie net in terme van finansiële bestuur nie, maar ook deur sy versuim om dienste aan die Mafube-gemeenskap te lewer soos grondwetlik verplig. Die OG het 'n aantal sleutelprestasie-aanwysers geïdentifiseer wat die omvang van MPM se onvermoë, onbevoegdheid en gebrek aan gevolgbestuur illustreer.

BASIESE VERPLIGTE DIENSTE    (6% i.p.v. 92% is behaal)	TEIKEN	BEHAAL
Persentasie huishoudings met basiese vullisverwydering	90%	0.01%
Persentasie huishoudings met basiese toegang tot water	90%	4.48%
Persentasie huishoudings met basiese tot sanitasie	90%	4.48%
Persentasie van rioolblokasies herstel binne 48 uur	85%	10%
Persentasie van waterlekke herstel binne 48 uur	75%	10%

Onreëlmatige, Ongemagtigde, Vrugtelose en Verkwistende Uitgawes

Benewens die ooglopende onbevoegdheid en gebrek aan gevolgbestuur by MPM, het die OG kommer uitgespreek oor uitgawebestuur en dat geen redelike stappe geneem is om onreëlmatige uitgawes van      R22 350 892 en ongemagtigde uitgawes van R339 649 598 te voorkom nie. 'n Verdere R63 150 759 is aan vrugtelose en verkwistende uitgawes aangegaan as gevolg van rente op laat betaling van verskaffers en litigasie.

Finansiële stelsels nie in plek nie

Die OG het opgemerk dat daar onvoldoende stelsels by MPM in plek is vir die bestuur van bates, inkomste, verkryging, kontrakte, menslike hulpbronne, bestuur en toesig. Die mees kommerwekkende is dat, ten spyte van duidelike regulasies, bystand van regeringsdepartemente en die aanstelling van konsultante; die bestuur van MPM steeds hul verpligting ignoreer om die finansies van die munisipaliteit te administreer in ooreenstemming met die Munisipale Finansiële Bestuurswet. Dit blyk dat die kritieke beginsels en doelwitte van Gevolgbestuur buite die begrip van diegene in beheer by MPM is.

MBF | 18A Kerkstraat | Frankfort | Maandae tot Donderdae | 08:30 tot 16:00 en Vrydae van 08:00 tot 12:30 | 079 145 4295 | info@mafubebf.org | www.mafubebf.org